Para velosport bo‘yicha terma jamoamiz a’zolari Shveysariyaning Surix shahri mezbonlik qilayotgan shosse bo‘yicha jahon chempionatiga jo‘nab ketgani haqida ma’lum qilgan edik. Bugun musobaqaning erkaklar o‘rtasida T1 klassida 11 km masofaga o‘tkazilgan vaqt poygasi bellashuvlarida ishtirok etgan hamurtimiz Aziz Ataxo‘jayev 20 daqiqa 30 soniya natija qayd etib, marraga uchinchi o‘rinda yetib keldi va jahon chempionatining bronza medaliga sazovor bo‘ldi.

Qayd etish lozimki, Aziz Ataxo‘jayev ushbu natijasi orqali O‘zbekiston para velosporti tarixida jahon chempionatida sovrindor bo‘lgan birinchi sportchiga aylandi.

Ushbu tarixiy g‘alaba bilan sportchimizni samimiy muborakbod etamiz va kelgusidagi faoliyatida ulkan zafarlar yor bo‘lishini tilab qolamiz.